Detalle do proxecto gañador "Every dog has it´s day"
Unha escaleira mecánica que remite á idea da fin de Europa, de espazos que non están feitos para vivir, de lugares de tránsito, que traslada unha atmosfera fría e cunha presenza moi contundente. Estas son algunhas das razón esgrimidas por Xesús Ron, director de Chévere, pola que a proposta titulada Every dog has it´s day de Javier Domingo foi a elexida nun pioneiro concurso público para converterse na escenografía de Eurozone, o vindeiro proxecto escénico da compañía. Esta obra de teatro, que ten a súa estrea prevista para o 31 de xaneiro, é un thriller político coa crise europea de fondo.
O alto nivel, a variedade a cantidade das propostas presentadas, 32 en total, fixeron que o xurado recoñeceran dous accésits. Un deles para a proposta “Naipes”, da que o xurado valorou a súa “natureza arquitectónica, un ambiente suxestivo de grandes propostas” e o seu carácter metafórico. ALberto López Porta foi o creador desta aposta. O outro foi para “Atraco perfecto” que cuestiona a arquitectura espectáculo, e propón unha escenografía que reproduce a pequena escala do proxecto da Cidade da Cultura. Este proxecto presentárono Jorge García Anta, Fernando Eiroa e o estudante de arquitectura Francisco Xabier Barral.
É una experiencia novidosa de colaboración entre a compañía teatral Chévere e o Colexio de Arquitectos, que está a abrir novas vías de difusión do traballo destes profesionais. Os proxectos presentados a este singular concurso de ideas poderanse consultar en breve no web do COAG.
