Entre o 30 de novembro e o 2 de decembro, medio cento de profesionais das artes escénicas dos países da lusofonía reuniranse na Cidade da Cultura. O III Encontro Internacional de Políticas de Intercambio en Artes Escénicas quere achegarlle aos participantes "un espazo de traballo para o intercambio de experiencias e o achegamento de posturas cara ao desenvolvemento de novos proxectos culturais", segundo explica a Consellaría de Cultura.
A situación das ensinanzas artísticas nos países participantes, a relación entre a empresa e a cultura ou a problemática do intercambio profesional no sector son algúns dos temas que se tratarán nas sesións do evento. A inscrición para participar no evento está aberta no web da Cidade da Cultura.
