No marco dos actos de celebración dos XXV anos do Camiño de Santiago como Itinerario Cultural Europeo, a cidade de Compostela acolle desde onte o VI Encontro Nacional de Xestores do Patrimonio Mundial. Logo dunha primeira xeira de visitas á cidade, hoxe comezan os debates e conferencias que buscan analizar a situación e posibilidades destes bens, nunha edición que ten como fío conduto "Patrimonio Mundial e desenvolvemento sostible: o papel das comunidades locais". Canda á experiencia de Compostela, coñeceranse propostas como as de Segovia, Poblet, Ordesa e Monte Perdido ou a Casa Batlló, entre outros espazos protexidos.
Dentro dos actos de celebración deses 25 anos do recoñecemento do Camiño de Santiago, o Museo das Peregrinacións abre hoxe a mostra Memoria de peregrinación, Camiño de Santiago, Primeiro Itinerario Cultural Europeo que percorre, mediante fotografías e unha peza audiovisual de Manuel Valcarcel e Alexandro González esta vía desde Europa Central ata Compostela.
