A mirada dos espazos no Museo Etnolóxico de Ribadavia
Unha selección de imaxes dos fondos do Museo Etnolóxico de Ribadavia compoñen a exposición A mirada dos espazos, que se inaugurou neste centro o pasado mes de setembro.
A partir de imaxes de diferentes autores, a exposición, que leva o lema de Cara a unha antropoloxía visual, pretende "proxectar unha ollada etnolóxica sistemática sobre os espazos visibles da sociedade que a imaxe fotográfica mostra e, ás veces, oculta". Deste xeito, amósase "un relato etnográfico no que asoman ámbitos e espazos da vida social, descritos e interpretados aqui como textos que suxiren, insinúan e falan".
Fotógrafos como Santiago Míguez Amil, Fernando García Fernández, Xenaro Martínez de Castro, Hipólito González Fernández, José Martín Sotelo Sancho ou Diego Quiroga e Losada, marqués de Santa María del Villar, entre outros, son os autores das fotografías que compoñen este relato, que convida a reflexionar sobre o papel da imaxe na memoria e na configuración da nosa identidade. A exposición poderá verse ao longo deste outono.
A mostra está dedicada á memoria de Benito Losada, desaparecido director da Casa da Xuventude de Ourense e promotor, entre outras iniciativas, do Outono Fotográfico.
