O Gaiás acolle II Foro de Espazos para a Cultura

Representantes de entidades como The British Museum, a Tate Gallery, a National Gallery of Denmark, o Museo Thyssen ou o Museo de Arte Contemporánea de Barcelona daranse cita entre o 7 e o 9 de novembro vindeiros na Cidade da Cultura no II Foro Internacional de Espazos para a Cultura (FIEC). O evento leva desta volta o título A araña na rede e pretende analizar as posibilidades da aplicación das novas tecnoloxías ao ámbito museístico.

Segundo sinala a presentación do evento, "a maioría destas institucións están aínda moi lonxe de utilizaren nin sequera unha pequena parte das innumerables posibilidades que ofrecen as novas tecnoloxías para explotar o seu patrimonio ou como patrimonio elas mesmas", xa sexa para da a coñecer os seus contidos fóra do seu espazo físico como para explicar mellor os fondos físicos que custodian. O xeito de aproveitar estas tecnoloxías non deixa, no entanto de xerar certa polémica, segundo apunta o propio texto, "por outra parte, recean perder visitantes reais a cambio de usuarios remotos, cando en ningún caso é unha experiencia intercambiable: a visita virtual non debe considerarse un sucedáneo da real, senón que se trata dunha vivencia diferente, e que en todo caso potenciaría a real".