A CTNL propón melloras no sistema de xestión dos CELGA

Mellorar a xestión das probas e dos cursos para a obtención do certificado oficial en lingua galega (CELGA). Este é o obxectivo da proposta que a Coordinadora de Traballadores/as de Normalización da Lingua (CTNL) acaba de lle remitir á Xunta de Galicia e que se pode consultar na rede. Malia a considerar que o sistema de acreditación de coñecementos posto en marcha hai cinco anos ten puntos positivos, desde a CTNL apuntan tamén eivas na validación dos certificados anteriores, nos contidos dos materiais preparatorios, na organización dos cursos ou no formato das probas. Coa intención de paliar estes problemas, a asociación remitiulle á xunta unha proposta integral para mellorar a planificación e a xestión destes certificados.