Vimianzo acolle unha xornada para actualizar o coñecemento sobre a Idade do Ferro

Baixo o título de "Que sabemos dos castros? Xornadas sobre investigación, didáctica
e comunicación da Idade do Ferro", o concello de Vimianzo presentou o venres estas xornadas de reflexión e divulgación. O evento, baixo a dirección do arqueólogo Ángel Concheiro, tenta actualizar e poñer en común os últimos coñecementos ao redor da Idade do Ferro en Galicia a través de múltiples enfoques. As xornadas celebraranse entre o 28 e o 30 de setembro de 2012 en Vimianzo e acollerán ponencias sobre arquitectura castrexa, sobre a relación entre os poboados galaicos e o seu contorno, ou sobre estratexias de divulgación e difusión ao redor da época.