Un risco traxicómico

A compañía Pífano Teatro estrea este venres 11 no Salón Teatro de Santiago a obra escrita e dirixida por María Armesto Winnie son eu, unha proposta traxicómica encadrada no teatro do absurdo e emparentada directamente con Samuel Beckett a través da personaxe do seu Happy Days, único perfil feminino de envergadura que destaca no universo de Beckett . Mela Casal produce e protagoniza esta obra na que comparte o escenario con Xavier Picallo, Marcos Sánchez Armesto e a propia María Armesto.

Na obra catro personaxes nun lugar inhóspito e desolado agardan que algo cambie no seu día a día sen logralo aparentemente pero sen deixar de intentalo. Os personaxes librarán unha batalla desesperada e cómica para intentar eludir o seu monótono presente fabulando esperanzadores futuros . A protagonista, situada no centro da escena sempre sentada na carcasa dun sidecar oxidado, bota man da imaxinación e da fantasía para escapar da súa situación e faino falando, cantando, amando rindo, odiando, lembrando, soñando. “Ela negase á tristeza e a desolación e busca tirar para adiante” di sobre a súa personaxe Mela Casal; a obra fuxe de tentar transmitir unha mensaxe xa que segundo María Armesto “non é o tipo de teatro con mensaxe, os espectadores tomarán as súas decisións pero non hai unha intención definida”. Xavier Picallo apunta neste sentido que “cada membro ten unha visión propia do espectáculo porque a obra permíteo” aínda que para el trátase dunha obra de base cómica aínda que de múltiples lecturas.

Unha produción de risco
Como produtora Mela Casal asumiu integramente o custe desta montaxe, para a que contaron coa colaboración do Centro Dramático Galego na cesión dos espazos para o ensaio e as primeiras representacións, tendo claro o risco que representa unha montaxe con catro actores “nestes tempos nos que o refuxio actoral está a ser o monólogo”, como lembrou Xavier Picallo, pero Casal declarouse entusiasmada polo texto que escribiu María Armesto e pola posibilidade de encarnar á protagonista.

Para representacións posteriores a estas da estrea a compañía terá que agardar pola resposta do público e a súa aceptación desexando poder chegar ben a eles e que iso permita que saian contratacións para levala a outros escenarios. Na presentación ante a prensa os membros da compañía agradeceron a colaboración de Manuel Guede ao que desexaron a mellor das sortes á fronte do CDG nesta nova etapa. O propio Guede abriu o acto afirmando o risco e a valentía que supón facer hoxe en día unha obra destas características. Winnie son eu estrearase este venres 11 ás 20:30 horas e haberá outras dúas funcións o sábado 12 á mesma hora e o domingo 13 ás 18 horas no Salón Teatro.

Foto: CDG

Foto: CDG