Un cento de creadores nados entre 1977 e 1994 participarán no II Encontro de Artistas Novos que se celebrará entre o 9 e o 14 de setembro na Cidade da Cultura. Segundo anunciou hoxe a Consellaría, artistas como Jorge Perianes ou Monserrat Soto farán parte dun encontro que pretende “apoiar a xente nova nos seus procesos de aprendizaxe, promover o seu labor creativo e impulsar a reflexión e o intercambio de coñecemento”, segundo asegurou Anxo Lorenzo, director xeral de Cultura.
Entre outras actividades, o programa inclúe conferencias e visitas aos centros de arte do noso país. As prazas para participar están abertas ata o vindeiro 29 de xuño, e a metade fican reservadas a creadores galegos.
