Silleda incorpora un Consello Municipal para definir a súa política cultural

Silleda vía nacer onte o seu Consello Muncipal de Cultura. Este organismo, formado por 29 colectivos de Trasdeza, pretende asesorar o concello en termos de políticas culturais e dinamizar a actividade neste campo. Está previsto que o novo órgano se reúna cada seis meses baixo a presidencia do responsable do Concello nesta área, e con presidente da Banda Recreativa e Cultural de Bandeira como vicepresidente. Esta mesma semana nacía tamén o Consello da Educación, e dentro do regulamento de participación cidadá está previsto a creación de outros órganos semellantes.

Segundo os datos do II Mapa sociocultural de Galicia, editado polo Consello da Cultura Galega, só 13 concellos do noso país contan con organismos autónomos con competencias en dinamización de actividades culturais, xa sexan consellos, fundacións ou padroados.