O Consello da Xunta acordaba esta mañá a creación do Observatorio Galego de Xuventude, un "órgano colexiado de participación, investigación e asesoramento das políticas de xuventude" que estará adscrito á Dirección Xeral homónima. O novo órgano encargarase de facer informes, analizar as necesidades e avaliar as políticas neste campo. Na súa composición estarán representantes da Vicepresidencia, das consellarías que afecten esta área, das tres universidades, do Instituto Galego de Estatítica, e mais da Federación de Municipios e Provincias.
A entidade contará tamén cun representande co Consello da Xuventude de Galicia, un organismo que tamén ten entre as súas atribucións a "elaboración e aprobación de informes e ditames, que serán preceptivos para a Xunta de Galicia cando se trate de promulgar disposicións que atingan de xeito específico á mocidade como colectivo social, na orde educativa, socio-cultural, sanitaria, laboral ou calquera outra".
