O Consello da Xunta analizou onte o texto do anteproxecto da futura Lei de Cultura Inclusiva e Accesible de Galicia, que será remitido aos órganos consultivos para a emisión dos informes preceptivos e exposición pública. Preténdese fomentar a participación e acceso á cultura a todo tipo de persoas e colectivos sociais, independentemente da súa idade, situación socioeconómica ou lugar no que vivan. O anteproxecto inclúe, entre as súas medidas, a creación dun Observatorio da Cultura Inclusiva e Accesible de Galicia para asesorar e facer seguimento do cumprimento da norma. Neste mesmo mes a Xunta anunciou á creación doutros dous observatorios do eido cultural: o Observatorio da lusofonía Valentín Paz Andrade e o Observatorio da Innovación do Patrimonio Cultural.
A norma de Cultura Inclusiva e Accesible de Galicia inclúe tamén que os axentes culturais responsables dos equipamentos, das programacións e do resto de tipoloxías de actividades culturais que se desenvolven en Galicia, incluídas as administracións públicas, velen pola elaboración dun plan de accesibilidade no que se detalle a situación de partida e as melloras que cómpre realizar, así como un plan de inclusión coas accións necesarias para integrar a todos os públicos.
