O anterior levaba vixente desde o ano 1992, pero a Xunta presentou na cuarta reunión do Consello Galego de Medio Ambiente unha "actualización" do plan de recuperación do oso pardo en Galicia, que suporá establecer obxectivos para "evitar a mortalidade non natural" ou aplicar medidas "para a conservación e restauración" do seu hábitat. Medio Ambiente tamén presentou na xuntanza o plan de recuperación do sapoconcho, que entre outras medidas, suporá a reintrodución da especie en catro novas localidades, canda plans específicos para dúas especies de aves: a píllara das dunas e a escribenta das canaveiras.
