O Ministerio de Medio Ambiente e mais a Consellaría investirán un total de 38 millóns de euros en medidas para protexer a diversidade biolóxica da Rede Natura. O Consello da Xunta aprobaba onte a subscrición do convenio que permitirá a creación de centros de interpretación e de espazos destinados á recuperación de fauna e flora, canda a outras medidas de protección e difusión. A medida afectará ata a un 20% do noso territorio, segundo os plans de ampliación da Rede que xa anunciou a Consellaría.
Ao tempo, o Consello da Xunta aprobaba tamén outro convenio entre as dúas entidades para a construción do Centro de Interpretación dos Parques Naturais de Galicia. Esta entidade, que se localizará en Ourense, centrarase na difusión e divulgación do coñecemento sobre cada un dos parques existentes. En total investiranse 8,5 millóns de euros neste proxecto, que se construirá en Quintela, nas proximidades do Miño. O edificio contará con salas de interpretación separadas para cada un dos seis parques naturais galegos, ademais de auditorio, tenda verde, oficinas administrativas e outras instalacións.