A Xunta aprobou hoxe o proxecto de decreto do plan para a recuperación do sapoconcho común (Emys orbicularis L.), unha senlleira especie dos humidais galegos que se atopa nunha difícil situación. Segundo un estudo da Universidade de Vigo, o número total de individuos estimados non supera o centenar de adultos por hectárea nas áreas do sur de Galicia onde se pode atopar: o río Arnoia, o Avia, as Gándaras de Budiño e nos humidais de Corrubedo. O plan contempla a definición do sapoconcho como "especie en perigo de extinción" e, xa que logo, unha serie de prohibicións respecto da súa captura, venda ou sacrificio.
