Política Lingüística prevé a fusión de Servizos de Normalización en concellos pequenos

O secretario xeral de Política Lingüística, Valentín García, compareceu esta mañá no Parlamento de Galicia por vez primeira desde que chegou ao cargo. Na súa intervención, sinalou que non considera viable que se manteñen servizos de normalización lingüística en concellos que teñan menos de 3.000 habitantes, e apuntou que, ao seu ver, estes servizos deberían desenvolverse de xeito mancomunado entre varias entidades locais. Ademais, apuntou que en moitos casos estes equipos se manteñen grazas ao apoio económico da Xunta e que a actual crise económica impide que se continúen a soster.

García respondía deste xeito a unha pregunta do grupo parlamentario do BNG encol da desaparición, no último ano, de 15 servizos de normalización en diferentes concellos do país. O deputado desde grupo, Bieito Lobeira, denunciou que as axudas previstas para a normalización no ámbito local esíxenlle ás entidades locais requisitos que dificultan o acceso ás mesmas.