Caldas terá este ano unha nova edición do Cultura Quente

Definiuse como un espazo aberto á interdisciplinaridade, con achegas de todo tipo de manifestacións estéticas, técnicas e artísticas. Por iso, o concello de Caldas acaba de asegurar a continuidade da décimo quinta edición do Festival Cultura Quente. Con todo, o alcalde asegura que terá “un profundo recorte” de fondos. Tal e como publica hoxe Diario de Pontevedra, sábese que a partida que destinará o concello ao festival baixará dos 132.000 euros de 2011 a uns 60.000 euros. Esa cifra condicionará o formato do festival, se será xestionado polo concello ou sacará a licitación da súa celebración (a produtora Esmerarte, era a organizadora do encontro desde 1998). “Serán menos grupos pero con actuacións os dous días” publica o citado medio que tamén explica cales son, para o alcalde local,os piares básicos: os concertos de rock, a exposición de arte efémera Kaldarte e a feira do albariño Mostra do Viño.