Ignacio Santos anuncia a súa saída da Cidade da Cultura

Chegou desde a dirección do Festival de Benicassim para facer fronte ao último ano Xacobeo. De aí, da man do anterior conselleiro de Cultura, Roberto Varela, pasou a xestionar a Acción Cultural da Cidade da Cultura co reto de “pór en marcha a programación para o segundo semestre de 2011 e elaborar o Plan Gaiás 2012-2018”. Agora, cos deberes cumpridos, Ignacio Santos afirma que se marcha. Así o asegura un comunicado remitido pola consellaría de Cultura, Educación e Ordenación Universitaria. A súa saída terá lugar despois da presentación do “Plan do Gaiás”, documento que contén a folla da ruta desta entidade desde 2012 ata 2018. A nota non indica quen será o substituto de Santos neste posto.