A Xunta abre as consultas para elaborar o Plan Estratéxico da Cidade da Cultura

Sesenta especialistas e seiscentas enquisas farán parte da redacción do documento

A Cidade da Cultura acaba de anunciar a posta en marcha do proceso participativo para elaborar o II Plan Estratéxico do complexo do Gaiás. Segundo recolle o web da entidade, nesta iniciativa "participarán 60 expertos, especialistas nas diferentes áreas nas que opera a Cidade da Cultura (cultura, tecnoloxía, turismo, emprendemento, natureza...)" aos que se engadirán 600 enquisas en liña para "escoitar a opinión da cidadanía". O documento que saia desta proposta marcará a dirección do complexo ata 2027.


Como principais retos "o impulso ao sector cultural, a internacionalización, así como o papel da Cidade da Cultura como factoría de contidos culturais para toda Galicia, na liña do que se está a facer coas exposicións, producindo mostras que logo se exhiben noutros espazos da comunidade. Xunto a estes obxectivos, o plan abordará a integración do Fontán, e con el o apoio á investigación universitaria, especialmente no eido dos estudos do patrimonio".