Xardín, 2011. Amaya González Reyes
As obsesións de Amaya González Reyes (Sanxenxo, Pontevedra, 1979) fan parte da última exposición en chegar ao MARCO de Vigo. Unha mostra na que a artista exhibe doce obras de recente produción na que pretende dar conta que o intento de plasmar unha idea pode ser máis gratificante que o resultado final. A mostra, que estará ata o 20 de maio, titúlase Entrar na obra. Perder(se) nela.
Instalacións ou esculturas/obxectos, unha videoproxección e cinco fotografías da serie Asalto (est)ético conforman esta mostra que conclúe o ciclo deseñado por Agar Ledo, Entrar na obra. O proxecto contou con 5 propostas e tomou o título da coñecida peza de Giovanni Anselmo Entrare nell’opera (1971). A súa intención era a de afondar no espectador, na súa pasividade e recepción, como unha parte indiscutible da obra artística.
