Nos últimos cinco anos o emprego de ordenadores na poboación galega de entre 10 e 15 anos medrou un 6,3%, o dobre da media estatal (3%). Este incremento deixa nun 96´7% o índice de nenos e nenas galegas que fan uso habitual deste aparello, unha cifra que tamén supera a media estatal, situada no 95,6%. A diferenza é semellante no emprego de Internet nesta idade, cifrado nun 88,8%. Os datos están extraídos polo Observatorio da Cultura do Consello da Cultura Galega da Enquisa sobre equipamento e uso de tecnoloxías da información e comunicación nos fogares do Instituto Nacional de Estatística.
A partir do mesmo estudo, constátase que o noso país é a quinta comunidade na que os rapaces e rapazas deste tramo de idade teñen máis teléfonos móbiles, un 70% dos enquisados, fronte ao 65,8% dos seus coetáneos do Estado.
