A reflexión sobre a banda deseñada en vídeo

O pasado xoves o Consello da Cultura Galega organizou a xornada Arte + Narrativa Gráfica. Ante un nutrido auditorio, algúns dos máis recoñecidos autores e teóricos da novena arte a nivel estatal reflexionaron sobre a historia e as peculiaridades deste medio. Desde a evolución editorial da BD ao longo do século XX ás orixes preindustriais deste tipo de narrativa, pasando polas peculiaridades do medio, nomes coma Juanjo Guarnido, Antonio Altarriba ou Ricardo Anguita achegaron intervencións de grande interese tanto para afeccionados como para leigos na materia.

Agora, a Mediateca do web do Consello da Cultura Galega permite seguir de xeito íntegro as conferencias que se desenvolveron neste encontro, incluíndo as interesantes intervencións dun público que, ben desde o coñecemento fondo da banda deseñada, ben desde a perspectiva doutras artes, contribuíu a completar as perspectivas deste encontro.