O Consello da Cultura reivindica a BD na apertura da xornada Arte + Narrativa Gráfica

A sede do Consello da Cultura en Compostela acolle a partir das dez desta mañá a xornada Arte + Narrativa Gráfica, organizada pola sección de Creación e Artes Visuais Contemporáneas desta entidade. Na apertura do encontro Ramón Villares, presidente do CCG, salientou que “se no cinema Galicia non puido ter figuras de primeira liña, no ámbito da banda deseñada está aí non só en Europa senón a nivel mundial” grazas ao traballo de creadores como o propio Miguelanxo Prado, e lembrou que a institución que preside “debe ser incitadora e amparadora de novas iniciativas como fai co portal Culturagalega.org e cos debates e xornadas que organiza”.

Pola súa banda, Miguelanxo Prado, coordinador do evento canda a María Luísa Sobrino, considerou no acto que lle parece “xenial que o Consello da Cultura galega abra un espazo a esta linguaxe creativa” e apuntou que a banda deseñada é aínda un espazo baleiro no mundo da cultura “que imos tardar moito en encher”. Nese sentido sinalou que “nos últimos vinte anos en Galicia foise producindo un agromar continuado e cada vez máis potenciado de creadores e creadoras pero non houbo unha reacción en paralelo por parte dos estamentos críticos e de estudo”, e reivindicou o cómic como única linguaxe artística que deu o século XX canda ao cinema. “Neste altura non se pode entender unha cultura sen facer referencias ao cinema e mais ao cómic”.

A xornada, que cubriu todas as prazas dispoñibles, contará con intervencións de recoñecidos nomes do sector da banda deseñada estatal e internacional, como son Juanjo Guarnido, Antonio Altarriba ou Ricardo Anguita.