Logo de anos de demora, o proxecto de urbanización para a área do Parrote, onda a Dársena da Mariña da Coruña, semella que quedará finalmente desbloqueado. A Dirección Xeral de Patrimonio da Consellaría de Cultura anunciaba esta mañá que informou favorablemente sobre o estudo de detalle que lle remitiu o concello coruñés. O novo proxecto inclúe na urbanización da zona a exhibición dos restos de estruturas defensivas que apareceran na zona, o que permitirá a súa restauración e posta en valor.
Canda a isto, está prevista a construción dun aparcamento xa fóra da área protexida, unha área de uso común e a creación dunha área edificable de 1.103 m2, que queda tamén fóra da zona de interese arqueolóxico.
