Galicia continúa á cola no uso das tecnoloxías da información no Estado

As políticas públicas autonómicas continúan a fracasar na mellora dos indicadores da Sociedade da Información en Galicia. Aínda que onte a Secretaría Xeral de Modernización se felicitaba de que, "por primeira vez máis da metade dos fogares galegos están conectados a Internet a través da Banda Larga", o certo é que os datos publicados polo Instituto Nacional de Estatística (INE) sobre a Enquisa de Equipamento e Uso de Tecnoloxías de Información e Comunicación nos Fogares neste 2011, son demoledores. Galicia ocupa o último posto en varios dos principais indicadores: uso de ordenador nos últimos 3 meses (62,2%), emprego de Internet nos últimos tres meses (58,5%) ou mesmo emprego do teléfono móbil (89,2%). Só nun elemento o noso país supera nun punto ao penúltimo na lista, Estremadura. E é no de usuarios frecuentes de Internet (53,4%).