Destrúen parte do sitio arqueolóxico de Taramancos

O alcalde de Noia, Rafael García Guerrero, denunciou onte no seu perfil de Facebook a desaparición de parte dos sectores excavados no sitio arqueolóxico de Taramancos, incluíndo unha vivenda completa da Idade do Ferro, polo que se aprecia na fotografía publicada por Guerrero. Tratábase dunha escavación de urxencia debido á aparición de restos antigos no trazado do novo vial de Noia, e que paralizara as obras do vial. Os achados desvelaron a existencia dun poboado moi antigo, da Idade do Ferro, de tipoloxía totalmente inusual en Galicia, xa que non está fortificado, e parece estar vinculado a actividades de explotación do medio mariño. culturagalega.org solicitou información ao respecto á Consellería de Cultura, responsable da liberación da cautela administrativa sobre o sitio arqueolóxico, pero o departamento autonómico non contestou ata o momento.


En declaracións a La Voz de Galicia, a Consellería de Medio Ambiente, Territorio e Infraestruturas solicitou "prudencia" sobre os traballos e aseguran que as máquinas non rozaron a área de protección. Sen embargo, nas fotografías publicadas por este medio e polo alcalde de Noia, é evidente a destrución das estruturas mencionadas previamente.