Educación suprime as axudas á edición de libros de texto e á normalización local

As convocatorias de axudas que o pasado mes de marzo facía a Consellaría de Educación para a edición de libros de texto en galego ("edición en lingua galega de recursos didácticos curriculares para niveis non universitarios") e de apoio á normalización para concellos (subvencións ás entidades locais de Galicia para a promoción do uso da lingua galega) quedan "sen efecto". Así o anuncia o Diario Oficial de Galicia de hoxe, que publica senllas ordes do día 7 nas que a Consellaría apela ao "necesario equilibrio entre ingresos e gastos" que "exixe nestes momentos efectuar un axuste nos créditos inicialmente asignados aos diferentes centros de gasto que conforman os orzamentos da Comunidade Autónoma de Galicia". Para alén, responsabiliza o goberno central da falta de fondos, indicando que a medida se adopta "ante os posibles incumprimentos, por parte do Estado, dos compromisos de achegas de anticipo do fondo de cooperación previsto para 2011 no sistema de financiamento e nos ingresos da comunidade".