A vindeira edición da Feira das Industrias Culturais, Culturgal, achega novidades na súa organización. Para comezar, os espazos distribuiranse entre o salón, onde se farán as presentacións, o cuarto dos Nenos, para actividades infantís, o patio, que acollerá as actividades de música e danza, así como proxeccións e mais o garaxe, centrado nas novas tecnoloxías da información e mais no audiovisual. Ao tempo, a feira oferta por vez primeira o servizo dunha tenda común na que todos os expositores poderán reunir os seus produtos, para alén de que poderán seguir vendendo nos seus propios postos. Ademais, celebrarase unha programación especial de Xantares no Culturgal. Ata o vindeiro 15 de outubro está aberta a contratación de espazos, con descontos para quen a faga antes do 25 de setembro.
Ao tempo, a organización do evento explicou que o xa anunciado Foro Culturgal, no que os profesionais da cultura do país debaterán estratexias de cara ao futuro, centrarase nos eixes da "Oportunidade dixital" e "Estratexias desde a periferia". A inscrición para esta actividade está aberta ata o vindeiro 25 de setembro.
