Culturgal busca a corresponsabilidade

Hoxe pola mañá presentouse o programa dunha nova edición de Culturgal, a principal feira de produtos culturais galegos. A organización alentou á "corresponsabilidade" no mantemento desta industria e se introducirá o pagamento dunha entrada "voluntaria". A feira presentou o programa con novos espazos para a música e o cine.

Xosé Manuel Aldea, coordinador de Culturgal, sinalou que a idea da corresponsabilidade materialízase nunha maior implicación das asociacións e empresas que forman parte de Culturgal canda ao patrocinio público da Xunta, AGADIC e o Ministerio de Cultura. O público poderá pagar unha entrada voluntaria e a cambio os asistentes recibirán unha chapa distintiva de micropatrocinio. A organización quixo dotar de máis relevancia aos asistentes á Feira, creando un Premio do Público con tres candidaturas: Asociación puntoGAL, Festival de Cans e Salón do Libro Infantil e Xuvenil de Pontevedra.

Un 25% do espazo feiral estará dedicado a propostas emerxentes non vinculadas á industria.

Víctor López, presidente de Eganet, sinalou en representación da directiva da Asociación Culturgal que, malia a suba do IVE e a desaparición de apoios no patrocinio, Culturgal é un escaparate de primeira orde para a actividade cultural en Galicia. " Culturgal supón expoñernos diante do público, o gran destinatario final do noso esforzo. Ese público que ten a posibilidade de comprobar durante os dias de Culturgal a diversidade de creacións, de formatos, de perspectiva, etc. Culturgal debe ser nese sentido avanzadilla e inevitablemente espello da actividade cultural galega", sinalou.

Unha cita “imprescindible”

O director da Agadic Jacobo Sutil subliñou que Culturgal é un evento necesario para a dimensión económica da actividade cultural, ademais dunha “gran festa da cultura galega”. A concelleira de Cultura Anxos Riveiro centrou a súa intervención na satisfacción que para o concello é a coller a Feira. “Os grandes proxectos de país tamén deben buscar o dinamismo das cidades”, dixo. No peche da rolda de prensa, o secretario xeral de Cultura da Xunta, Anxo Lorenzos afirmou que Culturgal é un cita “imprescidible” para a Administración autonómica. “Por varias razóns: porque é punto de encontro do sector profesional e poque está dirixida ao público, para estimular o coñecemento e tamén o consumo cultural. É moi interesante o achegamento directo do público aos procesos de creación e produción cultural”, remarcou.