O territorio das grandes pedras

Algunhas comarcas galegas preservaron de xeito singular unha gran concentración de monumentos megalíticos. Despois da inauguración do Parque Arqueolóxico da Arte Rupestre de Campo Lameiro, continúan os trámites administrativos para a disposición do Parque Arqueolóxico do Megalitismo, que abranguerá 15 dólmenes especialmente representativos da Costa da Morte. Xeolocalizámoschos por se queres adiantarte á apertura do Parque e coñecelos.

Dólmenes que formarán parte do Parque Arqueolóxico da Costa da Morte

Ver os dólmenes do Parque Arqueolóxico do Megalitismo na Costa da Morte nun mapa máis grande

A semana pasada o Diario Oficial de Galicia publicaba a Declaración Oficial de Impacto Ambiental do Parque Arqueolóxico do Megalitismo na Costa da Morte, un dos catro que conformarán a rede de Parques Arqueolóxicos da Xunta de Galicia. O proxecto do Parque do Megalitismo, que custará 4 millóns de euros (previsión de 2010) permitirá a musealización e coordinación de visitas de quince sitios prehistóricos da Costa da Morte. Cada un deles contará con aparcadoiros, sinalización e paneis informativos, mobiliario e apertura de sendeiros e consolidación de noiros.