Por causas que descoñecemos, a Costa da Morte concentra un numeroso grupo de megalitos, dólmenes prehistóricos erguidos hai máis de 5.000 anos. Por iso nun breve futuro a Costa da Morte acollerá o Parque do Megalitismo. Entrementres, este roteiro permite coñecer algúns dos exemplos máis representativos da arquitectura funeraria prehistórica.
O roteiro permite mergullarse non só nos monumentos prehistóricos, senón tamén en espazos lendarios que permiten comprender a relación entre o folclore tradicional e como reinterpretaba estes antigos espazos dolménicos. Deste xeito, a visita parte dun lugar entre Baio e Reparada, no concello de Vimianzo, e iníciase no Monte Torán, e continúa polos dólmenes de Pedra Cuberta, Pedra Moura, Pedra da Lebre, Arca da Piosa ou Pedra da Arca. É un fascinante itinerario que permite profundizar no mundo do megalitismo en Galicia.
