Só tres persoas tiñan acceso á camara onde se custodiaba o Códice Calixtino

Unicamente o Deán e arquiveiro da Catedral, José María Díaz, e mais dous colaboradores tiñan acceso á camara que albergaba o Códice Calixtino. Díaz comparecía hoxe á unha da tarde en rolda de prensa para responder ás preguntas dos medios e asegurou que a Catedral síntese "vítima dun roubo e dunha tremenda ilegalidade", confirmando así a sospeitas dunhas sustración desta obra. Ademais, recoñeceu que "quen levou o códice sabía o seu valor, como chegar a el e de qué se trataba". Segundo explicou, a cámara que albergaba o a obra desaparecida contiña tamén outras obras de importancia e era habitual o acceso a ela para llas proporcionar a diferentes investigadores, ainda que o Códice en si nunca saía da mesma. Esta foi a única peza que desapareceu deste espazo.

Díaz apuntou que o libro desaparecido non conta cun seguro específico, e sobre o seu valor sinalou unicamente que se propuxo unha póliza de mil millóns das antigas pesetas (algo máis de seis millóns de euros) nunha ocasión que se soliciou para un préstamo que non chegou a se concretar.

Segundo as declaracións dos dous arquiveiros con acceso á cámara, a última vez que hai constancia de a ter visto foi o xoves ou o venres da pasada semana, téndose verificado a súa desaparición este martes.

O Deán non apuntou ningún sospeitoso desta ausencia e evitou dar detalles concretos sobre as medidas de seguridade que rodeaban o libro e mais as circunstancias da súa falta.