Pontevedra desbota o seu Museo da Historia

O ambicioso proxecto do Museo da Historia de Pontevedra, que promovía a corporación local, será cancelado. O novo equipo municipal, composto por unha coalición entre o PSdeG e o BNG, acordou que non se desenvolverá a proposta coa que o equipo de arquitectos Loop gañara o certame de ideas para este centro. Segundo explicou Luís Bará, actual concelleiro de Centro Histórico, os dez millóns de euros de custo estimado do proxecto imposibilitan o seu desenvolvemento no actual contexto de crise. Nos vindeiros días darase a coñecer a solución adoptada para os restos arqueolóxicos que serían a base do centro. As propostas que manexa o Concello son a creación dun centro menos custoso ou, máis probablemente o seu soterramento baixo un parque.

A posibilidade de soterramento permitiría no futuro, cunha mellor conxuntura económica, retomar o proxecto de musealización. A fase inicial da obra, que saiu xa a licitación por 3,3 millóns de euros, será posiblemente paralizada nos vindeiros días, o que implicaría indemnizacións aos estudo de arquitectos que elaborara o proxecto. O proxecto fora unha das actuacións estrela da anterior tenente de alcalde da cidade, Teresa Casal, do PSdeG. O Museo pretendía ter como eixe os restos da muralla, da ponte e do único porto fluvial medieval que se conserva en todo o Estado.