Danesga busca socios para o seu proxecto entre o público e xestores culturais

A danza está de moda por multiples motivos. Nunca houbo tantas representacións nin tanto público para este xénero. Non hai máis que ver a programación deste mes na que destacan dous acontecementos: dunha banda, a estrea da primeira produción do ano do Centro Coreográfico Galego, 3dTres, que conta con coreografías dos reputados Tony Fabre, Ángel Rodríguez e Amaury Lebrun. E da outra, a Sala Nasa comezou a fin de semana pasada o seu ciclo dedicado á danza contemporánea. Despois de Janet Novás, chega o momento de Mónica García que ofrecerá mañá un solo no que se confesará en escena diante do público. Canda isto, Danesga acaba de ampliar o perfil dos seus asociados incluíndo tamén a público, xestores e “consumidores de danza”. Por 12 euros ao ano, esta compañía busca incrementar as vías de financiamento e de apoio para o seu proxecto para o sector.