Logo de dúas producións de ballet clásico como o Quebranoces e A bela adormecida, o Centro Coreográfico Galego atenderá á danza contemporánea. Faino con Full House, para a que contará coa presenza de Johan Inger (Estocolmo, 1967), coreógrafo asociado do Nederlands Dans Theater e director artístico durante cinco anos do Cullberg Ballet que debuta en Galicia. A estrea terá lugar o 3 de abril no Teatro Rosalía da Coruña, nun programa que incorporará a peza Magnificat, que Amaury Lebrun creou en 2011 para o espectáculo do CCG 3DTres.
Johan Inger debutou como coreógrafo en 1995 coa premiada ‘Mellantid’. Segundo unha nota de prensa remitida por Agadic, destacou axiña como “creador inventivo e cun amplo espectro estilístico que vai do cómico e teatral ao terreal e orgánico”. Foi director artístico do Cullberg Ballet sueco, no Ballet Real de Suecia, no NDT1 e agora mesmo compaxina o seu traballo como coreógrafo asociado no Nederlands Dans Theater coa súa carreira como creador independente.
