Algúns dos parques eólicos que se van instalar no noso país ao abeiro do novo Plan Eólico poden afectar a bens patrimoniais e a paisaxes destacadas. A asociación ecoloxista ADEGA denunciaba hoxe que as pistas e instalacións do parque eólico Outes, repartido entre este concello e Negreira, afecta a un importante conxuntos de restos arqueolóxicos. Ademais, o parque Barbanza I, situado na área as Chans do Barbanza, pode ter efectos sobre unha destacada concentración de restos, entre os cales se atopa a Arca do Barbanza, un destacado exemplo do megalitismo no noso país. Do mesmo xeito, o colectivo apuntou a instalación de varios destes parques en espazos de interese natural, como é o caso do Barbanza I, Os Penidos en Valdoviño, ou Salgueiras en Ponteceso, así como a proximidade do previsto en Xinzo á Zona de Protección de Aves da Limia.
