"No anterior ano había 70 creadores con dúas páxinas cada un. Ao haber só unha páxina por cabeza tamén tiveron que seleccionar máis os traballos e mellorou a calidade media da Guía", explica Gutiérrez. Logo da presentación oficial, o pasado 13 de maio na Festa do Libro da Coruña, comezou a distribución do volume que xa chegou á totalidade das editoras galegas así como a produtoras audiovisuais e axencias de publicidade, entre outras empresas. Ademais, o catálogo irá tamén ás principais firmas deste tipo a nivel estatal e distribuirase nas feiras internacionais nas que estea presente a asociación.
Á luz desta obra, Gutiérrez referenda o bo estado xeral da Ilustración galega. "A nivel artístico mantense a tendencia dos últimos anos, estamos entre o melloriño a nivel estatal. Destacaría, iso si, que cada vez hai máis xente nova que se asocia, e que en xeral mellorou a profesionalidade dos creadores. A xente esixe contratos mellores e peléxanse máis os dereitos".
