Por unanimidade, o xurado do VI Premio Xela Arias, formado polos membros da Xunta Directiva da Asociación Galega de Profesionais da Tradución e da Interpretación (AGPTI) mais unha representación da Mesa pola Normalización Lingüística, como entidade gañadora da edición anterior, decidiu outorgar o premio á Asociación Galega de Editoras pola importancia do seu traballo a favor do colectivo editorial, así como por representar un sector cunha gran pegada pública no que a profesión da tradición "ten unha visibilidade moi relevante e no que o diálogo entre profesionais e empresas é moi aberto e directo". O xurado sinalou que nos últimos anos constatouse un "aumento na aparición de editoras que teñen a tradución como unha das súas principais áreas de traballo", polo que este premio é, tamén, segundo eles, a forma de agradecer desde a AGPTI ese vínculo co seu sector e de valorar moi positivamente que a relación entre tradutoras e editoras estea cada vez máis profesionalizada. Ademais, o xurado do Premio Xela Arias quere agradecer a traxectoria da Asociación Galega de Editoras como entidade colectiva e o seu traballo reivindicativo a favor dun sector máis vivo e cohesionado.
