Continúa o debate sobre o inventariado do Estaleiro de Purro como Patrimonio Cultural

Mesmo despois de que a Xunta anunciase que incluirá a carpintaría de ribeira de Purro, en Bueu, no Inventario Xeral do Patrimonio Cultural, continúa a polémica sobre este conxunto. A Asociación de Veciños Santa Ifigenia desta vila presentou alegacións á protección do ben, reclamando que a área de protección prevista para o mesmo é estensa de mais e asegurando asimesmo que moitos dos elementos que se queren protexer son na realidade máis modernos do que recolle a Dirección Xeral de Patrimonio. Ao tempo, o Ministerio de Medio Ambiente remitiulle á Xunta un escrito no que advirte asimesmo que o conxunto contén partes que non se axeitan á protección patrimonial, como muros de tixolo, un aseo, ou un almacén que non fan parte da construción orixinal, e reclámalle á administración que explique as razóns da protección.