O suplemento El Cultural dedica un especial á cultura feita en Galicia

É un dos suplementos culturais máis reputados da prensa estatal, El Cultural, que edita o xornal El Mundo, dedica na súa edición desta semana un especial Cultura en Galicia. Dez páxinas nas que dá conta da situación actual da nosa realidade cultural. Con cualificativos de “dinamismo e vitalidade”, fai un percorrido pola situación literaria (da que contrapón a efervescencia creativa ante a necesaria reconversión editorial); o complexo da Cidade da Cultura; os éxitos do audiovisual galego (encabezados pola animación e os traballos de Vaca Films, sen descoidar figuras como Luís Tosar); a oferta artística (centrada nos dous centros CGAC e MARCO) e o bo momento da música clásica (coa Real Filharmonía e a Orquestra Sinfónica de Galicia como principais reclamos).