Un circo de seres fantásticos ambientará a entrega de premios do teatro galego

Bailarinas, trapecistas, acróbatas, monologuistas e clown acompañarán ao Doutor Crisé (Gonçalo Guerreiro) e ao seu axudante Casemorro (Pedro Brandariz) na entrega dos galardóns do teatro galego. É a liña temática escollida este ano para os María Casares, a gala que premia a produción escénica do ano 2010 repartido en 13 categorías. A cita terá lugar o vindeiro mércores 23 de marzo e a dirección do espectáculo corre a cargo de Carlos Sante e de Juanillo Esteban. A gran favorita desta edición é a obra Un cranio furado, de Producións Excéntricas, que opta a 10 categorías, seguida polas sete candidaturas de Memoria de Helena e María, de Teatro do Atlántico, e mais de As actas escuras do Centro Dramático Galego.