A adaptación teatral dunha obra de Teresa Moure é a favorita dos María Casares

Fíxose co XIII Premio Rafael Diestre de Teatro e agora é a gran favorita dos premios María Casares. A primeira incursión teatral de Teresa Moure, Unha primavera para Aldara, que representa Teatro do Atlántico ,é a gran favorita dos María Casares. A obra conta con nove candidaturas entre as que destaca mellor espectáculo, dirección, texto orixinal e actriz (protagonista e de reparto). Séguelle Obra de Produccións Teatrais Excéntricas con sete candidaturas. Teñen catro Aeroplanos de Lagarta, Lagarta; A boa persoa de Sezuán do Centro Dramático Galego e Dame veleno, eu tamén soñar de Sarabela Teatro. Os gañadores saberanse o 25 de marzo nunha gala que terá lugar no teatro Rosalía de Castro da Coruña.