Desaparición de cartos en efectivo así como publicacións destinadas para a venda e consulta, gravacións sen permiso visibles desde Youtube, así como desperfectos nas obras expostas. Estas son algunhas das queixas que o director da Fundación Seoane, Alberto Ruíz de Samaniego, transmitiu ao Concello da Coruña en relación coa actuación da empresa de vixianza (concesionaria desde o pasado mes de agosto). Así o asegura hoxe o xornal La Opinión que fai referencia a unha carta que Samaniego lle remitiu ao xefe do servizo de Cultura. Os feitos chegaron ao pleno municipal en varias ocasións e o concello asegura que as incidencias foron “oportunamente resoltas”. No entanto, o servizo de Cultura pide á mesa da contratación que se rescinda o contrato da empresa de vixilancia.
