Samaniego presenta o seu proxecto expositivo para a Fundación Seoane

Dous meses despois de ser anunciado, Alberto Ruíz de Samaniego (Fene, A Coruña, 1966) presentouse hoxe como director oficial da Fundación Seoane. E fíxoo anunciando as primeiras mostras do seu proxecto museístico. Aproveitando a candidatura da Torre de Hércules, a fundación recuperará os 40 orixinais do álbum ilustrado debuxado por Luis Seoane que leva por título “Homenaxe á Torre de Hércules”. A análise da fotografía de Alberto Korda, autor da imaxe máis célebre do Che Guevara; a mostra documental sobre os diferentes límites xeográficos do atlántico; o arquivo fotográfico dos irmáns Vargas e unha exposición sobre Fritz Lang son algúns dos proxectos que se poderán ver na sede da fundación ata o mes de setembro.