Propostas teatrais diversas, para públicos moi diferentes e todas concentradas nunha semana. Estes son os ingredientes das Xornadas Excéntricas que arrincan mañá na Coruña. Do 5 ao 12 a empresa Producións Excéntricas poñerá en marcha Shakespeare para ignorantes (Fórum metropolitano, sábado e domingo), O peor de Mofa e Befa, un conversatorio con Kiko Cadaval (na Rúa de San Andrés, falará con todo aquel que lle pague ao polifacético creador un euro) e a súa última produción, Un cranio furado. O proxecto é resultado da colaboración entre PT Excéntricas e o concello da Coruña.
