Unha ofrenda floral e unha mesa redonda pechan os actos de homenaxe a Luís Seoane

O cemiterio de Santo Amaro alberga os restos de moitos galegos ilustres. Ao lado do sepelio do pintor Francisco Llorens e moi preto do polígrafo e activista Leandro Carré, repousa Luís Seoane (Bos Aires, 1910- A Coruña 1979). E será nese lugar onde a Real Academia Galega realice unha ofrenda floral coa que se poña fin aos actos organizados co gallo do centenario do seu nacemento (comezarán ás 12:30 horas). Pola tarde, o salón de actos da Fundación Caixa Galicia (Cantón Grande, 21-24) acollerá unha mesa redonda na que participarán Xosé Luís Méndez, Xosé Luís Méndez Ferrín e Xosé Luís Axeitos.