A Real Academia homenaxea a Seoane no camposanto de San Amaro

O vindeiro sábado 18 o cemiterio de San Amaro, na Coruña, acollerá a homenaxe de Real Academia Galega a Luís Seoane con ocasión do seu centenario. O evento comezará ás 12:30 horas da mañá e consistirá nun recital de gaita e mais nunha ofrenda floral que irá acompañada dunhas palabras do presidente da RAG, Xosé Luís Méndez Ferrín. Tamén se visitará a tumba de Murguía, primeiro presidente da Academia, como recoñecemento ao preto de medio cento de intelectuais que repousan neste camposanto. A coincidir con esta conmemoración, a RAG publicou un mapa no que sinala con cruces a situación no cemiterio das tumbas dos homenaxeados, entre os que se atopan as de Ánxel Casal, Leandro Carré Alvarellos ou Miguel González Garcés, entre outros.