Arredor de 3.400 cintas magnetofónicas, 150 discos magneto-ópticos, 500 casetes e un importante número de CD´s conforman o arquivo de Radio Nacional de España en Galicia. Un importante legado sonoro e documental que agora será catalogado e dixitalizado da man do Arquivo Sonoro de Galicia do Consello da Cultura. Ao longo dos vindeiros dous anos, persoal do Consello traballará na sede da radio na Coruña e encargarase do traslado dos fondos que se conservan nas diferentes delegacións da cadea, mentres Radio Nacional achegará os medios técnicos necesarios para a tarefa.
