Xurxo Mariño, científico e divulgador

É un nome fundamental na divulgación científica no noso país. Para alén dos seus estudos en neurociencia, Xurxo Mariño leva anos a traballar a prol da implantación dunha cultura científica no noso país mediante artigos, conferencias, cafés científicos e todo tipo de actividades.

¿Cando coñeciches o portal?
Arredor de 2002.

¿Como o ves na actualidade?
Penso que agora mesmo é a ventá de referencia para se informar da maior parte dos
aspectos da cultura do país, cando menos eu véxoo así. E é unha ventá moi ben deseñada e moi ben levada.

¿Que pensas que lle falta?
Sempre me gustaría que a ciencia se considerase unha parte da cultura, e eu como colaborador do portal fago por iso. Pero é curioso que cando se fai a axenda, gustaríame que se incluísen tamén as actividades de ciencia, que hai moitas e para todos os públicos. Agora métense cousas de teatro, de música, do resto da cultura, pero fanse actividades científicas que tamén deberían aparecer.

¿Hai algún servizo que empregues habitualmente ou algún contido que lembres de xeito especial?
Consulto de xeito habitual a páxina principal. Logo, como ando dun lado para outro éme moi útil o resumo da semana que enviades cada venres, coas novas principais. Hai algunhas novas que se me pasan, ao mellor porque non estou por aquí, e con iso podo manterme un pouco ao día.