Cultura anuncia a delimitación do Camiño Francés para este ano

A delimitación do Camiño Francés chegará ao Consello da Xunta antes de que remate o ano. Así o anunciou o Conselleiro de Cultura, Roberto Varela, quen destacou a importancia deste proxecto para garantir a protección do contorno da ruta. A delimitación establece polo miúdo por onde pasa a Ruta Xacobea e as actuacións permitidas nas áreas que a circundan. A partir desta ferramenta poderá desenvolverse en 2011 o Plan Especial de Protección para a ruta, segundo adiantou o conselleiro. No entanto, os concellos de Triacastela, Samos e Paradela, xa anunciaron que alegarán ante o itinerario proposto por Patrimonio, que propón trazados alternativos á vía. Ao tempo, as zonas de protección propostas nalgúns tramos tamén lles parecen esaxeradas aos rexedores destes concellos. O prazo de alegacións está aberto ata o vindeiro 31 de outubro.